Del nga koma pas 19 vjetesh...

aLba_16 October 23rd 2008, 5:28 pm

an Grzebski, një 65-vjeçar polak, punonjës hekurudhash, zgjohet pas 19 vitesh të gjata të kaluara në koma. Në vitin 1988 u godit aksidentalisht nga një tren, incident që i shkaktoi dëme të rënda cerebrale, aq sa mjekët i dhanë vetëm dy vjet jetë. Por bashkëshortja e tij, Gertruda, nuk do të pranonte kurrsesi të dorëzohej përpara kësaj gjendjeje dhe kundër çdo parashikimi të mjekëve, për asnjë çast nuk e humbi shpresën se një ditë i shoqi do të zgjohej. I qëndroi mbi kokë për 19 vite të gjata. I fliste, e përkëdhelte, i tregonte ç‘ndryshime po pësonte Polonia dhe gjithë Evropa. Dhe si katolike e mirë, nuk ndalte asnjë çast së shpresuari se mrekullia një ditë do të ndodhte. Në rast se Zoti kishte hequr draprin e çekanin nga Polonia, përse të mos pranonte të kthente në jetë edhe bashkëshortin e saj? Dhe siç tregojnë mjekët, të mrekulluar nga ky rast, "për 19 vite, e vetme kreu punën e një ekipi ekspert infermierësh, duke i ndërruar pacientit pozicionin e trupit çdo një orë, në mënyrë që të evitonte krijimin e plagëve". Historia e vërtetë ngjan në mënyrë të pabesueshme me ngjarjen e filmit të njohur "Lamtumirë Lenin", në të cilin Alex Kerner, personazh i luajtur nga Daniel Bruhl, në mënyrë që t‘i evitonte ndonjë shok të mundshëm, u përpoq t‘i fshihte nënës së zgjuar nga koma rënien e komunizmit në Gjermaninë Lindore.

Jan Grzebski, baba i katër fëmijëve nga Dzialdovo, qytet në veri të Polonisë, ishte rreth 45 vjeç dhe jetonte në ditët më të këqija të regjimit komunist, në çastin kur ra në koma. E megjithatë vëren se as transformimi drastik i ekonomisë polake, as arritjet më të reja teknologjike, siç janë celularët, nuk kanë arritur të ndryshojnë rrënjësisht jetën e bashkëkombësve të tij.

"Kur hyra në koma, nëpër dyqane gjeje vetëm çaj dhe uthull, mishi ishte i racionuar dhe radhët ishin të pafundme...", tha Jan Grzebski në një intervistë dhënë për televizionin polak, TVN24. "Tani shoh njerëz me celularë rrugëve dhe nëpër dyqane gjen aq shumë gjëra, sa të mbetesh me gojë hapur. Por ajo që më çudit te këta njerëz që vërtiten duke folur nëpër celularë, është se qahen gjatë gjithë kohës. Më duket se nuk kam pse të kem asnjë peng".

Që kur ra në koma, fëmijët e Grzebskit janë rritur, janë martuar dhe e kanë bërë gjysh të 11 nipërve e mbesave, të cilët i pa për herë të parë pas zgjimit.